N farjangn Samstahk haww ich miche mit meen Mähchn in meene Karre jeschwungn un hann uns uffjemacht nachn Nordn. Von Halle üwwar einijn Jemeindn un Kleckardörfarn bis nache Saaleschtadt Bernburch mittn in Anhalt. Dar Grunt war niche schwer zu arratn. S war de Apschlussfete vons Anhalt Achthunnart Juwiläum. Von n Apschtellplatz fars Fahrzeich jings recht jut zum Festjelände, ohne Wechweesar odar Kartn hann mar schnell s Ziel jefunn. Dar sonnije Tahk hat siche wunnarbar jemacht zum schparziern jehn durch de engn Haisarjassn. Ums Schloss rumme jank's Volk un kukte siche an, was de Schtadtleite farbereetet hann. Musikalische Unnarhaltunk jabs zur Jenieje zwischn de Schlossmauarn. Oo wenns jetze niche so meen Musichjeschmack treffn tat. Ville Betriewe un annare Förmn hann siche in kleen Zeltn jezeicht un farjestellt. Far miche jabs ne Packunk Salz frisch vons Berchwerk un n Kurelschreiwar von dar jleechn Schtelle. De annarn Leite hann uns nischts hinnarher jeworfn. Villeecht hattn se oo nischts fars Volk.
An villn Stän'n hatts oo jenuch zur Arnahrunk jejehm. Also farhungarn konnt keenar. Fars entschprehnde Kleenjelt jabs natierlich oo n schluk zu trinkn, denn bei villn Loofn un Salz naschn, sin scho ville Leite bei de Hitze ausjetrocknet. An de annare Biehne fars Theatar jabs far de Omis un Opis de Enklkinnars zu bekukn, wie se siche als Fresche farkleedet hann und üwwar de Biehne uff un ap jehuppt sin. Ne annare Kinnarkruppe hat siche als Hexn farkleedet, se warn wahrscheenlich von Brockn jekomm, wo s ja bekannt is, dass da so mansches krummnasijs Weipsbilt är Unwesn treipt. Uffn Besn jeflon jings awwar widdar runnar von de Biehne un annare naizeetliche Tanztruppn zeichtn är Kennn. Mitn bisschn Niwoo kamn de Volkstänzar un Tänzarinnn vons Schloss Plötzkoo un zeichten wie siche de Bauarnvelker frieher bewecht hann. Zwar war inn Tänzn nich vill Schwunk drin, awwar de Leite hann sich jefreit far de Darbietunk.
Ahmts kamn n paar Bänds uff de Biehne, wie Glasperlenspiel un de Tante mit ärn ewijn Jedudl zum Sommar. Ich jloob Oceana wurre se jeschriem. Awwar befar das Janze anfing, haww ich miche widdar inn Wahn jesetzt un bin jefahrn. De beedn Truppn warn ja scho im Juli in Dessoo, wo ich se mich oo nich anjekukt haww. Dafier awwar n paar annare, de riehtich jut warn.
Mitn jroßn Fest in Dessoo im Juli kann Bernburch niche mithaltn, alleen de Jröße des Festjeländes war zich ma kleenar. Wemmar jetz noche n paar freindliche Jesichtar odar annare Sonnkeppe jesehn hätte, hätte ma längar bleim könn un sich nochn bisschn von dar Musich rinziehn könn, s jab ja oo noche annare bänds als de beedn ohm jenanntn. Awwar mahr als 6 Meiln (eene anhältsche Meile sin unjefahr siemnhalp kilometar) von de Heemat entfarnt, trifft ma keene mahr. Jedar dar dort war, hätt sichar was jefunn, was än intressiort hätt. Hä hätt siche ammisiert, wien kleens kinnschn. Odar oo niche.
Wunnarscheene Jrieße vons Wetterschaf
kein Kommentar
Kommentar veröffentlichen